維港癲噹聖誕遊樂園 小襪兔阿讚貓揭序幕

荃灣海濱嘅「維港癲噹開心村」自開幕以來，一直深受歡迎，癲噹美人魚同癲噹小巴係打卡熱點。黛安聽聞，今年聖誕節本地文創「貓室」會幫佢哋添新裝，換上充滿聖誕氣氛嘅節日角色裝扮。癲噹就會帶領「小襪兔」、「阿讚貓」一眾好友為「維港癲噹聖誕遊樂園」揭開序幕，同大家歡度聖誕。

大家入場就會見到5米高嘅巨型癲噹聖誕樹，呢棵聖誕樹係由單車人力發電，想睇燈飾就要畀心機踏單車喇。另外，仲有4.2米高嘅癲噹雪人、癲噹蛋撻氹氹轉等。至於好多小朋友鍾意嘅癲噹小巴，就會搵埋阿讚貓加開小小紅Van和小小綠Van班次，小朋友可以做埋小車長，喺場內玩飄移。

「維港癲噹聖誕遊樂園」即日起至12月底開放，1月初換農曆年裝置，大家把握時間去打卡喇。