【聲明】港生活網站並無進行電話推廣活動

黛安
黛安

維港癲噹聖誕遊樂園 小襪兔阿讚貓揭序幕

發佈時間: 2021/12/08

維港癲噹聖誕遊樂園 小襪兔阿讚貓揭序幕

荃灣海濱嘅「維港癲噹開心村」自開幕以來,一直深受歡迎,癲噹美人魚同癲噹小巴係打卡熱點。黛安聽聞,今年聖誕節本地文創「貓室」會幫佢哋添新裝,換上充滿聖誕氣氛嘅節日角色裝扮。癲噹就會帶領「小襪兔」、「阿讚貓」一眾好友為「維港癲噹聖誕遊樂園」揭開序幕,同大家歡度聖誕。

大家入場就會見到5米高嘅巨型癲噹聖誕樹,呢棵聖誕樹係由單車人力發電,想睇燈飾就要畀心機踏單車喇。另外,仲有4.2米高嘅癲噹雪人、癲噹蛋撻氹氹轉等。至於好多小朋友鍾意嘅癲噹小巴,就會搵埋阿讚貓加開小小紅Van和小小綠Van班次,小朋友可以做埋小車長,喺場內玩飄移。

「維港癲噹聖誕遊樂園」即日起至12月底開放,1月初換農曆年裝置,大家把握時間去打卡喇。

撰文: 黛安 消息特靈八卦公關
欄名: 八卦名利場