以正能量迎接新一年

踏入2022年，今年大家可唔可以happy new year？老實講，由年尾到年頭睇嘅新聞，真係好多單都令我既擔心又唔開心。2021年年尾，我帶住灰色念頭邁向新一年。一年之計在於春，踏入新一年帶住負能量，點捱到去今年年尾？既然年關難過都要過，我必須加強內在正能量，好好調整自己嘅心態，去面對迎接假設唔想發生卻會發生嘅事。

2021年過得艱難，今年我哋會唔會開始學習逆境求生呢？肯定2022年好多嘢都會大洗牌，如果原地留喺個舒適圈度惶恐不安，倒不如培養閱讀習慣，培養自學能力，學習一門新技能，鍛練反思能力，提升個人質素。或者你喺今日仲未摸索到成效，但如果能夠持之以恒，學習與時並進，應該能夠融入社會，不被淘汰。

老實講，而家提到元宇宙、NFT藝術及虛擬貨幣投資，我真係聽到好迷惘，但個社會向住呢個方向行發展，我必須盡力去了解吸收。

雖然而家尚未出現單獨連接嘅元宇宙，但已經有好多類似元宇宙嘅平台同專案概念︰例如SecondLive，佢造就一個3D虛擬環境，用戶可以喺其中控制虛擬化身進行社交、學習及商務活動。用戶亦可以喺度提供交換收藏品，我唔知NFT市場算唔算成熟，但係好多投機者已經喺NFT取得好成功嘅收入。2021年底，蘇富比NFT銷售額達1億美元，吸引咗一批「年輕嘅精通技術收藏家」。

周杰倫嘅潮牌「PHANTACi」同Ezek平台聯名推出PhantaBear NFT，2022年1月1日開賣，限量1萬個秒殺，瞬間熱賣1千萬美元！之後周杰倫旗下官方強調呢個商業行為並唔係周杰倫推出嘅NFT，佢只係收到來自PHANTACi送來嘅「Phanta Bear」NFT禮物，並無參與此商業行為嘅任何策劃經營，及未取得任何收益。

嘩！真係機會處處，新一年我會唔會有呢啲機遇呢？

（本欄逢周四刊登）