陳淑蘭
陳淑蘭

小心口業種下惡果

發佈時間: 2022/01/27

小心口業種下惡果

萬般帶不走,惟有業相隨。業乃佛教術語,指由思想驅使成行為,呢啲行為未來會形成結果,帶來因果報應。造口業係佛教經典業嘅一種,屬身、口、意業嘅其中一業,語言絕對會導致因果。根據佛教嘅講法,十不善口業分︰妄語、兩舌、惡口和綺語。

妄語由學習說出毫無根據的謊話,顛倒是非黑白。兩舌即係利用機會喺兩人之間說三道四,搬弄是非,最終目的在於挑撥離間。惡口指不停謾罵、同人意見不合後詛咒人。綺語指說話笑裏藏刀,或者用花言巧語去呃人。綺語範圍好廣,凡令人有邪惡思想嘅言語都屬於綺語。

無啦啦做咩會講到口業呢樣嘢?我之前陪一位隻腳成日無端端腫嘅朋友,去拜會一位高人,高人話我朋友雖然心地善良,卻時時口出誑言,惹來好多禍畀自己。

聽到呢啲嘢,當然信則有不信則無啦,但聽高人講道理,講到佛陀喺《起世經》卷四教導出家人時講道︰「世間諸人在世時,舌上自然生斤鐵,所謂口說諸毒惡,還自衰損害其身。應讚嘆者不稱譽,不應讚者反談美,如是名為口中諍,以此諍故無樂受。若人博戲得資財,是為世間微諍事,於淨行人起濁心,是名口中大鬥諍。如是三十六百千、泥羅浮陀地獄數,五頞浮陀諸地獄,及墮波頭摩獄中。以毀聖人致如是,由口意業作惡故。」

呢啲都係畀世人嘅忠告。希望大眾能善護自己嘅口業,勿種下惡因,損耗福報。

我有感而發,係因為而家互聯網發達,好多人可隨心所欲喺網上留言,但有好多無中生有嘅惡言,唔知當時佢哋係出於乜嘢心態去發表?係咪因為佢哋認為自己喺網上可以隱藏身份,就可以隨便講?我相信無論你有無宗教,又或者係乜嘢宗教,最終就算人不算,天都會算!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭