谷愛凌擁有好心態

疫情令人心情鬱悶，每日的新聞令人擔憂，真係要搵啲有朝氣嘅人和事去補充元氣。

近期睇到中國滑雪混血美少女谷愛凌喺冬奧大放異彩。佢唔止貌美、有實力同智慧，佢嘅性格同樣散發出正能量。你可能質疑，我又唔識佢，點知佢性格係點？因為谷愛凌喺中國真係好紅，紀錄片《谷愛淩︰我，18》已播出，片中圍繞住谷愛凌童年至少女嘅成長生活經歷，可了解佢嘅多面人生。

喺冰雪世界裏，谷愛淩自信自強，被人稱為「天選之子」；喺平常生活裏，佢詮釋咗00後自由、愛玩活潑嘅天性。滑雪之外，仲有廣泛興趣，鍾意嘗試各種新鮮事物，對打籃球、沖浪、騎馬、射箭、攀岩、打高爾夫、潛水、演歌劇……都有濃厚興趣，一樣用積極態度去嘗試。

片中谷愛淩表示︰「我嘅生活唔係圍繞住滑雪，但滑雪佔好大一部分。」喺佢眼中，滑雪同其他愛好並無不同，甚至學習都要排喺滑雪之前。可見佢對自己嘅未來有好清晰嘅認知，而佢嘅心態亦好強大同正面。

人紅自然是非多，有支持亦有攻擊佢嘅人同聲音。面對一系列外界雜音，谷愛凌喺採訪中霸氣回應︰「如果唔鍾意我係佢哋嘅損失，因為佢哋永遠都贏唔到奥運會。」呢番說話我一啲都唔覺係佢自大，而係自信嘅表現，我亦應該學習，用信心保護自己嘅情緒，唔好咁易受外界打擊。

佢亦有好多正能量金句，如︰「當我跌倒時，確定自己無受傷，然後企起身，總結經驗後再試一次。」「我覺得當一個人為咗一個目標去努力時，唔單止達到目標呢件事令佢快樂，努力嘅過程同樣值得享受。」

喺佢身上，我確信有好心態同性格嘅人，一定有成功嘅人生！

（本欄逢周四刊登）