陳淑蘭
陳淑蘭

為社會注入互愛活力

發佈時間: 2022/03/10

為社會注入互愛活力

呢波疫情令人人自危,家有老人與小孩就更加步步為營,步步驚心。日日有老人院嘅院友受到嚴重威脅,一旦感染,由於多間公立醫院運作已超出負荷,完全失控之餘,好多老人家好似人球一樣,完全唔知點安置,甚至等到死。呢一幕幕慘況,令我心酸心痛到不能形容。安老院舍缺人缺物資,我好想去做照顧員服務佢哋,但因年邁母親正在接受治療中,我唔可以喺呢個時候中招。

幾日前見到好友林琳立法會議員嘅facebook,內容提到佢連同其他兩位有心嘅立法會議員,向7間安老院舍送贈包括N95口罩及快速測試劑,令堅守崗位嘅護理員們可以多一份保護。

了解咗情況後,我即刻諗起萬通保險,佢哋係一間好有愛心嘅企業,我即時聯絡希望佢哋可以捐贈物資支持老人家。佢哋二話不說即刻拍板,捐出5,000套口罩及檢測劑去幫助老人家。林琳議員亦馬上牽頭,協調好有多間安老院舍嘅香港聖公會福利協會作為受惠機構。

噚日行政長官林鄭月娥喺疫情記者會上增加對長者嘅支援同保護,我聽到後都感到安慰,希望能夠大大截停老人家嘅生命危險,畀佢哋平安渡過。天佑香港,唔好再有人痛失家人及朋友了。

疫情下好多人都面臨壓力爆煲嘅狀態,多一份關懷,多一份愛,有能力嘅你不妨多啲留意下,幫輕下,大家多多益善,少少無拘,一齊用心協力,多關心關懷我哋嘅老人家,同埋有需要嘅人。大家情牽一綫,一方有難,八方支援,我哋重新為社會注入互愛與活力!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭