多些體諒 愛與尊重

全球疫情仍未受控，仍存在好多未知之數。我哋已逐漸改變咗人與人之間嘅相處同生活模式，甚至係整個經濟體系，令外出購物客流量大減，零售商更加依賴快遞公司送出網上定單，這趨勢正改變零售商業模式。

其實宅經濟唔算係新鮮概念，早喺2010年電商平台興起，人們即使足不出戶都可以喺屋企消費。如今面對呢個特殊時期，喺特殊需求下，人人宅喺屋企，「宅」成為一切活動嘅宗旨，上網買日用品、外賣已成為宅經濟產物。

呢兩個月第5波疫情肆虐，令好多速遞員染疫，無事嘅工作人員可能要一人肩負派發所有貨品，令不少速遞貨品未能如期送到，速遞員每日都被顧客投訴責罵，令速遞員壓力爆煲。

Bob（林盛斌）喺社交媒體上發文︰「呢個世界有好多嘢，無百分百嘅啱定錯，但係有一樣嘢係最基本嘅，就係包容。呢段日子，對速遞行業嘅影響非常之大，因為人手不足，好多時一個人要做3個人嘅嘢，一日幾萬單確診嘅時候，佢哋仍然辛苦工作。」

「其實我真係好尊重每一位速遞員。你估如果佢有得舒舒服服坐喺餐廳入面食嘢，佢會唔會選擇坐喺個垃圾桶旁邊食飯盒？人哋已經匿喺一個盡量唔影響他人嘅地方，諗住嗱嗱聲扒埋嗰兩啖飯就繼續送件，然後你影咗佢張相放上網諗住公審再去投訴，其實唔可以話你唔啱，你有你嘅道理，只不過成件事好無同理心，好唔善良。」

我非常欣賞佢挺身而出為速遞員發聲。喺咁艱難嘅時候，感恩有依然為我哋工作嘅每一位朋友，我哋先至可以好好在家抗疫，點解我哋唔可以多啲感恩，多啲體諒，多啲愛與尊重，畀為我哋付出嘅人呢？

（本欄逢周四刊登）