遇上「快樂缺氧」反應要快

年廿八嗰日，媽咪朝早起身時一切正常，到食完中午飯後就不停瞓。我以為因為天氣凍咗，所以特別嗜睡。過咗晚飯後，媽咪開始神志好唔清晰，問非所答，更軟弱無力，行路需要我同工人姐姐扶先起到身，我以為佢太攰，於是同工人姐姐一齊扶佢入房瞓。

見到瞌埋眼又無乜反應嘅母親，以為佢真係攰到熟睡，原本諗住返屋企嘅我，拖住媽咪隻手愈睇愈唔放心，於是不斷打電話請教啲醫生朋友。大家無見到媽咪嘅情況，只係聽我形容，以為我媽咪係小中風，叫我快啲call白車，唔好錯過搶救嘅黃金3小時，我有啲猶豫，因為當時已經係第5波疫情開始爆發，擔心媽咪年紀咁大會容易受感染。我真係好混亂，但最終都打咗999。

醫護人員好快到，將媽咪送去急症室。護士話我媽咪血氧含量88%，屬低血氧，非常危險，問點解咁遲先送佢入院？其實一直以來我都無血氧呢方面嘅醫學常識。當醫護人員畀足夠氧氣媽咪，大約一個鐘，佢嘅意識及身體狀況已大有改善。

經一事長一智，慢性低血氧症狀，「快樂缺氧」又被稱為「隱形缺氧」或「沉默缺氧」，初期患者缺氧會不自覺，唔會特別唔舒服，亦唔會氣喘，但隨着病情惡化，當缺氧症狀浮現時，例如呼吸急促、心悸等，呼吸會愈嚟愈吃力，病情急速惡化，到最後昏迷、停止呼吸甚至死亡。令人擔心嘅係，從惡化到死亡時間可能只係得半日，身體完全無辛苦反應，因此被稱為「快樂缺氧」。

感染流感、新冠同肺部相關疾病都可能導致血氧下降。如果血液中氧氣含量低於正常水平時，或出現低血氧情況，要保持空氣流通，並嘗試深呼吸，保持冷靜並盡快求醫。

（本欄逢周四刊登）