親人驟逝帶來心靈創傷

呢波疫情真係死得人多，好多身邊朋友家中嘅老人都避唔到呢個劫。最悲哀係，過程中因醫療崩潰，老人家大多數幾經波折，度過一波又一波，穿山過海，飢寒交迫，好多因為捱唔過而走了。最傷痛就係，好多家人都不能陪伴告別，甚至唔能夠見最後一面，長輩便與世長辭。

最最痛心嘅係，之前唔夠地方、唔夠棺木，相信大家都喺電視新聞睇到老人家嘅遺體，因無足夠地方存放，一具具遺體只係用黑袋袋住。就算唔喺現場，睇到新聞中咁嘅情景都感到痛心。家屬要面對以上環境，悲痛欲絕嘅心情，絕非筆墨可以形容。

朋友同我講，話佢父親在世時同佢笑住講︰「我大半生勞勞碌碌捱世界，到我死嗰陣，你記得幫我風光大葬呀！」朋友話之前勢估唔到父親死前呢個遺願，而家竟然係一個奢望……

望住朋友同我講呢番說話，嗰刻條脷好似塞咗落個心口度，不能言語之際，仲好似唞唔到氣咁，完全唔知可以畀乜反應，因為我個心痛到不得了，忍喊忍到窒息；局外人嘅情緒都痛到呢個程度，家屬喺呢段時間既要奔波，卻不能為離世親人好好辦後事，嗰種遺憾同傷痛真係……唉！

因為呢波疫情來勢洶洶，好多家屬來不及同去世嘅親人告別，死者走得孤獨，生者失落難捨。親人驟逝，令人震驚且難以消化，呢啲打擊對心理造成嘅衝擊真係好大。大多數創傷事件產生嘅影響可能唔會即時浮現，有機會封存喺心中多年，漸漸蠶蝕我哋嘅心理健康，又或者潛入潛意識中，扭曲我哋嘅人格特質，直到症狀出現時，已對心靈造成嚴重破壞。我擔心精神疾病將會好嚴重，呢方面我哋不能忽視。希望精神健康呢方面，社會可以提供更多支援。

（本欄逢周四刊登）