【聲明】港生活網站並無進行電話推廣活動

陳淑蘭
陳淑蘭

女性的三千煩惱絲

發佈時間: 2022/04/07

女性的三千煩惱絲

Will Smith喺奧斯卡頒獎典禮上,因不滿頒獎人Chris Rock嘲諷太太甩頭髮嘅外表,失控衝上台當眾毆打對方,引發譁然。

原來佢太太Jada喺2018年因圓形禿,俗稱「鬼剃頭」嘅免疫疾病而導致嚴重脫髮。Jada喺社交媒體上表示,過去幾年內一直同脫髮問題搏鬥,呢個情況啱啱開始時真係好可怕。佢一邊講,一邊將相機移去影佢剃光咗嘅頭頂上,一條光禿禿嘅綫,佢自嘲呢個脫髮症狀,將會同佢暫時成為朋友。其實佢用咗好耐時間去克服並嘗試接受呢個光頭。

鬼剃頭係局部出現嘅脫髮問題,常見於頭頂或頭部兩側,喺頭皮上出現一個或幾個5毫硬幣咁大,光禿禿嘅甩髮面積下能直接見到頭皮。部分脫髮患者,或者都會發生眼眉、腋毛,或男士鬍鬚等部位嘅毛髮,喺短時間內甩晒,引發全禿、皮膚炎或更多問題,作為女性真係好難接受。

自古至今,擁有一頭烏黑亮麗,似瀑布一樣嘅頭髮,可以令女性特別自信。如果開始甩好多頭髮,真係既驚又傷心,但愈傷心愈有壓力,就愈甩愈唔受控制。女性脫髮一般係由頭頂開始變疏,原因有好多,例如家族遺傳、甲狀腺疾病、系統性紅斑狼瘡、頭皮真菌感染、治療藥物副作用(如癌症化療、抗抑鬱藥或避孕藥等)、飲食失調等。至於「休眠期脫髮」則與生理及精神壓力有關。過度節食亦會影響頭髮嘅營養,導致甩髮。

三千煩惱絲,留住煩,留不住更煩。脫髮除有損儀容外,到底與患病有無關係?女性點解比男性更易因病而脫髮?有皮膚科醫生解釋,僅20%女士的脫髮與遺傳有關,更大可能是患上缺鐵性貧血、甲狀腺病等先兆,因此不能掉以輕心。

話時話,我見到嗰啲無憂無慮嘅女性,頭髮又真係多啲喎,你信唔信?

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭