【聲明】港生活網站並無進行電話推廣活動

陳淑蘭
陳淑蘭

捱餓才懂珍惜食物

發佈時間: 2022/04/14

捱餓才懂珍惜食物

我一直都有一個習慣,就係不浪費食物。每逢去餐廳有飯餸剩,必定打包返屋企。好多朋友笑我,問我係咪真係會食隔夜餸?唔止隔夜,有陣時擺咗喺個雪櫃多日,只要check咗無變壞,我都會照食。我契爺好欣賞我呢點,佢話好少人願意食剩餸,佢話珍惜食物係一種福氣。

其實我點解咁珍惜食物呢?呢個同一位舊同學有關。記得以前有一個平時食嘢好腌尖嘅富貴女同學,父母送佢去咗英國讀寄宿學校,有一次佢喊住咁話畀我聽,讀寄宿學校無啖好食,就算粒燒賣跌咗落個好污糟嘅地下,佢都會照放入口食,呢個行為佢喺香港係絕對唔會做。佢呢個經驗令我印象深刻,加上我曾經試過喺屋企無嘢食嘅時候,打開雪櫃發現有自己差啲唔記得咗嘅剩餸,嗰種如獲至寶嘅感受,造成我「打包」嘅好習慣。

上海自3月30日進入「全域靜態管理」模式,暫時解封無期,居民被禁足家中,「足不出戶」,除咗必要嘅基礎設施運作人員外,所有人車幾乎一律禁止外出。所有人僅能倚靠政府補給物資,或用手機app叫外賣網購,但因為上海嘅人口實在太多,政府人員要負責檢測同埋封區,好難兼顧所有屋企開飯嘅問題,加上快遞哥哥人手嚴重不足,電商物流遭到「卡關」,好多住戶面臨「糧盡」危機,我有好多家境富裕嘅上海朋友,佢哋正體驗緊「江郎才盡」,即係米缸、糧食、菜都完全食盡。

以前我去上海嘅時候,呢班招呼我嘅朋友,大魚大肉,食得富貴飲得豪,相信大家都無諗過有今日嘅局面,就係無論你幾有錢都要捱餓。之前睇到好多內地網紅拍譁眾取寵浪費食物嘅片。生喺太平年代嘅我哋,真係無諗過需要咁樣捱餓。所以經過呢一次逆境體驗,希望大家都會珍惜食物。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭