陳淑蘭
陳淑蘭

報復性熬夜

發佈時間: 2022/04/21

報復性熬夜

細個時睇到報復(revenge)呢兩個字,通常都用喺人身上,正所謂君子報仇十年未晚,今時今日,呢兩個字竟用嚟形容消費同旅遊。

大家太耐唔敢出街、無消費一段長時間,其實可能係餓咗好耐想去消費,於是終於可以去街,消費時嘅內心狠勁,爆發性好強,可能因為咁,所以用報復性消費嚟形容。

其次就係由社會動盪至今疫情起伏,唔少香港人持續感到困惑同無助,好想暫時離開呢個地方出外透透氣,可惜事與願違,飛出五指山障礙重重,無旅行時間表,令人覺得更抑壓。既然係咁,就將本來用去旅行嘅使費,甚至用比之前更高嘅金額瘋狂購物,去釋放抑壓已久、無得去旅遊嘅憤恨。我可能誇大咗啲,但係「報復性」乜乜,其實內在都帶有怨氣而爆發出嚟嘅發洩行為。

呢段被困嘅日子中,除咗用使錢嚟報復外,仲喺不知不覺間,用唔瞓覺嚟報復。What?唔係我亂噏,社會學家克羅西(Floor Kroese)表示,「睡眠拖延症」係一種自願性熬夜現象,即使無非熬夜不可嘅原因,大家都因為各種心理因素而無按時就寢,其中包含補償心理下嘅報復性行為。

「報復性行為」係近日各大媒體版面常出現嘅用詞,描述當人們感到恐慌、限制或被剝削時,會採取一些行為令自己稍微好過啲,藉以紓減受傷的情緒。

然而我哋除咗用消費、旅遊等行為嚟彌補我哋曾經被限制嘅自由外,亦會透過報復性熬夜作為補償,彌補自己喺生活中失去嘅主控權。我哋可能覺得用睡眠換取多啲自由時間,能幫助我哋減少日間被工作塞滿而產生剝削嘅受害感。殊不知長期報復性熬夜,係用自由作為代價,嚟剝奪番我哋自己嘅睡眠同健康㗎!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭