【聲明】港生活網站並無進行電話推廣活動

陳淑蘭
陳淑蘭

照顧長者壓力大

發佈時間: 2022/04/28

照顧長者壓力大

感恩!媽咪住咗2個月醫院,終於可以出院喇。呢段時間,有老有嫩嘅家庭,一定日日心驚膽顫。我媽咪喺年廿八call白車入院,因為係過年假期間,睇開媽咪嘅醫生放假,搵唔到佢哋,我好緊張唔知應該點樣安排媽咪,應唔應該畀佢喺醫院繼續治療。

你可能好奇問,媽咪喺醫院點解仲要唔知點安排?因為媽咪時刻掹走氧氣,加上嘗試逃跑,院方要用安全衣捆綁佢,加上非常時期,家屬不能探訪,我嘅心又痛又亂,有輕度腦退化嘅佢,時刻被綁,所以我除咗憂心佢嘅身體狀況外,亦非常心痛佢嘅心理狀態。

之後全城醫療崩潰,醫院根本無位畀老人入院,更多老人要喺街上冒住寒風等入院,我一路睇新聞一路喊,更令我心驚膽顫,痛心所有要捱苦嘅老人家及佢哋無助嘅屋企人,呢個絕對係一個黑暗時期。

媽咪而家要24小時聞氧氣,因長時間臥床而有褥瘡,唔可以縫針嘅大傷口需要日日清洗,食物及飲水都要用凝固粉餵食等等。由媽咪被送返屋企嗰刻開始如臨大敵,手忙腳亂,呢啲形容詞都唔可以貼切咁形容要突如其來照顧媽咪嘅情況。其實我好好彩,身邊有照顧開長輩嘅朋友,畀咗寶貴經驗支援我,而且幸運地有3位貼心嘅家傭姐姐,齊心盡力照應,喺緊急嘅環境下,亦搵到一位有耐性及有照顧經驗嘅保健員姐姐輔助。

我唔係獨自一人面對照顧不能自理嘅媽咪,唔夠一星期已身心疲累;有好多無我咁幸運嘅仔女,佢哋可能面對住更大嘅生活同照顧壓力,「照顧壓力感」就更加大,面對多重風險因素而產生負面情緒,沮喪、疲憊等。希望社會各界能有更多畀照顧者家庭及被照顧者在不同人生階段嘅需要,加強照顧者支援服務。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭