陳淑蘭
陳淑蘭

疫情改變慣性思維模式

發佈時間: 2022/05/05

疫情改變慣性思維模式

香港排名生活節奏最快城市的第一位。香港係高度繁榮嘅國際大都市、全球3大金融中心,亦係全球最自由經濟體同最具競爭力嘅城市之一。香港寸金尺土,動力無限,想要喺香港生活得好,就要時刻不停,希望可以快人一步理想達到。呢份不知不覺嘅緊張節奏空氣,從細呼吸到大,已習以為常,行路、講嘢、食嘢、諗嘢、反應,乜都要快!

隨住我年事已高,記性差到認為自己已經有腦退化,時時緊急想諗起某件事,但多數諗唔到,愈緊張愈要諗到就愈諗唔到,腦內一片空白,呢啲其實係咪腦霧呢?

今次疫情,我多咗好多安靜時間發吽豆,喺發吽豆過程中諗到好多我應該要去諗而之前唔為意嘅事。因為之前根本唔會靜坐,有時間都同朋友傾偈啦。又或者諗都諗啲遙遠將來嘅事。自從呢個疫情出現後,每日變化多端,呢一刻嘅安排下一刻已唔work,要再諗過另一個安排,有計劃都變成無計劃咁。總之呢個疫症唔單止改變世界,亦改變咗我嘅慣性思維模式。

喺呢個狀況下,焦慮係一種自然反應,時刻都擔心唔知附近有無人確診,或自己隨時隨地被隔離,因為我有4狗3貓1雀,仲有年邁嘅阿媽,如果要去隔離,佢哋點算?

媽咪之前入咗醫院,求神拜佛唔想佢出院,因為外面嘅老人家好危險,萬一出咗院,有乜事又入唔番醫院,咁點算?

每日都諗呢樣諗嗰樣,但又不能有安排,因為生活全變得被動,諗都無用,只能用當機立斷嘅模式來行事。所以有時候個腦繃得太緊,當靜下來嘅時候,真係要盡量畀自己relax下,如果唔係長時間處於高壓狀態,唔去抒發壓力、自我調解,就容易令自律神經失調,影響埋身體失衡,咁就弊傢伙喇!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭