Change！挑戰舒適圈

所謂舒適圈，代表一個人對自己工作、正在做的事非常熟悉，毋須花甚麼力氣就可以做得好。其實舒適圈並非真係好舒服，長期太少挑戰對我們嘅成長並無好處，例如每日做重複嘅事情。唔係叫你二揀一，離開Comfort Zone，就即係要放棄安全同熟悉，只要將舒適圈擴大，建立更大更有彈性嘅舒適圈。

點實行呢？一、定期做啲新事情，可以好簡單，例如搭唔熟悉嘅巴士，去你唔熟悉嘅港鐵站落車，然後四圍行。試一間新餐廳，然後留意自己嘅心情係咪覺得較為有滿足感和成就感？二、如果過程中覺得有不安，可提醒自己只係暫時性；三、由小步開始，唔好立即挑戰自己嘅死穴！少少擴大微調自己嘅行為模式，太大幅度嘅改變會令壓力增加，失敗機會亦增加，下次就更難挑戰離開舒適圈。

畀身邊人知道你正在改變，等佢哋都為你所定下嘅挑戰目標加以配合，防止佢哋喺不知情下潑冷水。身邊人明白自己正在擴闊舒適圈，作出改變時，會用新角度去期望你，當然自己亦要配合，例如以前未必邀請你去行山，而家會邀請你，你就唔好放飛機啦！有時候，當你可能想放棄嘅時候，身邊人嘅提醒同鼓勵，絕對係一個好大嘅動力。

你好叻叻，記住，唔好唔記得多謝自己呀。當離開「恐懼區」進入「學習區」或「成長區」時，要為自己慶祝，感謝自己可以挑戰限制而得到成長！有需要時亦可回歸已擴大的舒適圈，你會更加明白自己需要啲乜，可以再預備下一個挑戰了！恭喜你！

（本欄逢周四刊登）