【聲明】港生活網站並無進行電話推廣活動

陳淑蘭
陳淑蘭

童年負面經歷影響深遠

發佈時間: 2022/05/26

童年負面經歷影響深遠

男童「挨」跌1.8米高天綫得得B公仔,之前家長為咗平息事件而賠錢了事。事件放上網後隨即引發討論,究竟係店家定家長有問題。當我睇到條片時,發覺個小朋友嘅反應應該係呢件事最大關注點!試代入一個5歲人仔,自己都唔知點解,突然間有個咁大嚿嘅嘢砰彭一聲喺身邊粉碎,嚇唔嚇死?記得十年前,我喺某百貨公司碰跌掛喺聖誕樹上嘅裝飾玻璃球仔,bling嗰一聲,我係大人都驚咗一段時間,咁呢個小朋友嘅遭遇,驚嚇程度可想而知。

負面童年經驗會導致毒性壓力,呢啲毒性壓力會損害大腦同健康,甚至影響佢哋人生不同階段。當然創傷對人嘅影響因人而異,遇上同一件事,有啲人會無乜反應,有啲人卻可能會受到嚴重傷害,患上創傷後壓力症候群,有機會帶嚟情感後遺症。

精神病學家Bessel van der Kolk話過,部分童年負面經歷會導致小朋友嘅大腦一直保持警戒,令佢哋處於隨時反擊或逃跑嘅心理模式。一開始呢個係大自然賦予人類嘅生存本能,但如果呢種高壓狀態一直持續,或力度過大,就會導致小朋友大腦嘅杏仁核對外界信息誤判,從而出現對一啲普通事情都有激烈反應。

呢種大腦狀態嘅後果,有可能導致小朋友嘅情緒難自控,甚至會出現暴力行為,佢哋嘅記憶力同語言能力,亦可能受到影響。弗洛伊德亦有過類似說法。佢話,當孩子接觸到嘅刺激,超過咗自身控制同釋放能量嘅界限時,小朋友就會產生一種創傷感同危險感。

所以話,小朋友嘅心真係好脆弱,要好好保護。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭