瘋狂卻饒有深度的奇異女俠

已經有兩年多無入戲院睇戲，上星期五終於同老同學去金鐘睇《奇異女俠玩救宇宙》。之前提唔起勁去戲院，係因為有得睇無得食，若有所失。對我嚟講，一路咬住爆谷，一路飲住汽水，一路睇戲，咁先至過足戲癮！

好開心，今次無失望，呢套戲令我好滿意。

呢套《奇異女俠玩救宇宙》，大玩電影多重宇宙嘅概念，鏡頭剪嚟剪去，亂中卻有序；瘋狂卻內有玄機，題材既離地卻現實。踏入元宇宙紀元，睇呢套戲，先嚟畀我感受一下，往後無論電影或現實，好多嘢都會向住呢種題材軌迹。戲中楊紫瓊飾演移民美國嘅華裔大媽秀蓮，穿越多重宇宙嚟拯救世界，兼彌補家庭關係，題材瘋狂卻饒有深度。

呢套電影令楊紫瓊嘅演技獲外界盛讚，堪稱歷年來嘅巔峰之作。我最愛嘅荷里活女星珍美李寇蒂絲（Jamie Lee Curtis），身材高䠷，前凸後趷，今次卻帶住個大肚腩，喺其中一個宇宙內，佢同楊紫瓊仲係一對擁有香腸手指嘅戀人，瘋狂中卻帶有愛嘅信息，兼且每個宇宙其實都有聯繫，又真係make sense喎。真係服咗編劇，好嘢！

楊紫瓊爆料指導演本欲邀請成龍同佢合演夫妻，但遭成龍拒絕。楊紫瓊透露：「有一日成龍傳短訊畀我，恭賀《奇》片獲得佳績，然後話此片導演曾赴內地搵佢，希望邀請佢做主角，結果遭拒絕。楊紫瓊回覆說︰『你走寶了，兄弟！』」

我反而覺得如果將故事放重喺成龍度，會唔會變得更好睇？唔知呢？就好似呢套戲嘅宇宙元素，一件事有無限可能……唔好諗太多嘅可能喇，既然活在當下，最緊要係珍惜眼前人。

（本欄逢周四刊登）