沈桃
沈桃

未來最缺的人才

發佈時間: 2022/06/06

未來最缺的人才

同事Susan食晏時,唉聲嘆氣,話個仔大學畢業啦,但唔知有乜嘢出路,又話有一技之長就可以搵到穩定工作的日子已經過去,自動化和AI預計會取代大量現有工作!

吓!唔係啩!

Susan話,佢睇咗McKinsey個研究報告,自動化對零售業的影響很大,從超級市場的自動收銀機到麥當勞的自助點餐,機械化的工作最容易取代。

Susan又話最弊個仔唔係讀醫,否則就唔憂無工做!因為該報告話對人手需求不跌反升的是醫療相關行業,特別是醫生和護士,醫療人手在未來最難被自動化。

聽佢咁講,記起早前有個多國大學合作做的研究,新冠疫情令各國更重視醫療人手,全球醫護人手短缺約為4,300萬人,這是一個十分驚人的數字,發展中國家的短缺特別嚴重。例如在剛果每10,000人只有4個醫生,中非共和國每10,000人更只有1個醫生!相對之下,加拿大每10,000人有52個醫生。

至於香港每10,000人約有20個醫生,落後鄰近的日本和新加坡,所以醫療人才在未來肯定是最搶手的。

早前李嘉誠基金會公布捐1.5億給中大醫學院,又捐500萬給香港護理專科學院。提早一步投資在醫療人才,的確有先見之明!

(本欄逢周一刊登)

撰文: 沈桃 好飲好食好奇之穿花蝴蝶
欄名: 中環蝴蝶