【聲明】港生活網站並無進行電話推廣活動

陳淑蘭
陳淑蘭

娶錯老婆非同小可

發佈時間: 2022/06/09

娶錯老婆非同小可

俗語有云,男怕入錯行,女怕嫁錯郎,其實男人都怕娶錯老婆㗎。娶咗好女人,旺三代;娶錯壞女人,毀三代。近期最佳代表者非Johnny Depp莫屬,佢畀前妻Amber Heard搞到雞毛鴨血,前途幾乎一鋪清袋。

Bill Gates話︰搵到合適嘅人結婚先至係佢一生中最聰明嘅決定。

股神巴菲特話︰人生中最重要嘅投資係決定同邊個結婚,而唔係任何一筆股票投資。

東漢班昭寫的《女誡》亦有提到,夫婦之道係人倫大節,有至深陰陽參配之理,通達於天地萬物。正所謂「信天地之弘義」,關係重大,影響極深遠。丈夫若無德行,則無法引領妻子;妻子如果不賢德,則無法侍奉丈夫。所以男子嘅教育固然重要,女子嘅倫理道德教育就更係必須。

睇返Johnny Depp前妻所講嘅每個大話,係倫理道德教育嘅最大反面教材,當佢謊言被揭穿時,完全面不改容,已去到最高境界。由4月11日開始,一連好幾日開庭受審時,透過媒體相片發現,Amber似乎有意模仿Johnny前一日嘅穿衣配搭,好多人懷疑Amber以心理戰術方式消耗Johnny以及其團隊,引起佢哋嘅煩躁,試圖激怒Johnny。

佢哋話呢個係社會心理學當中嘅「交換理論」(Social exchange theory),我之前真係無聽過呢種心理學。呢個理論話,當你一直睇到人有意無意咁模仿你嘅動作、穿搭或說話時,會出現莫名嘅煩躁感,尤其係當對方係你討厭嘅人。

嘩!呢位Amber Heard真係居心叵測,最毒婦人心!遇到咁高深嘅對象,都真係單身自保算。(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭