【聲明】港生活網站並無進行電話推廣活動

陳淑蘭
陳淑蘭

告別至愛母親

發佈時間: 2022/06/16

告別至愛母親

由細到大,一直都好驚有一日媽咪會離開我。偶然夢見媽咪離世就會喊醒,而呢日終於要面對了。

爸爸1991年離世,因為我無特別為意自己嘅情緒,令不知不覺堆積嘅負面情緒爆發。從嗰日起,身體、心靈同靈魂都將我活埋喺深坑中,當自己好傷心,反應係會大笑,內心知道痛,卻感覺唔到,於是我會自殘,令自己感到痛,先確定知道自己仲係生存喺呢個世上。

嗰時仲後生,亦對情緒呢方面無咩知識,浪費咗好多時間去尋找方法治療。今日到咗呢個年紀,我再無時間條件可以再跌入情緒深淵,所以今次媽咪離開,我警惕自己要小心觀察身心狀態。

幸運係,身邊好友都用佢哋嘅愛睇實我、撑住我。原來之前媽咪已同我身邊好友講,佢擔心如果有一日佢走咗無人會照顧我。嗰時好多朋友已經答應會睇住我。當媽咪喺醫院臨走嗰刻,喺醫院或喺電話旁同我媽咪告別嘅朋友,都同我媽咪講︰「Auntie,放心,我哋會照顧住淑蘭,你唔使擔心。」

喺父母眼中,無論仔女幾大年紀都覺得佢哋係小朋友,時刻需要擔心同保護,我媽咪生前已經每秒鐘都擔心住我嘅健康同幸福,所以我唔可以令佢再放唔低我,走得唔安樂。我要活得好,識得愛惜自己,就等於愛我母親。

假使你同我一樣失去至親嘅話,我哋唔使抑壓傷痛,要喊就喊。之後就要好好咁活出自己嘅人生,以回報愛惜你嘅至愛。

無論係唔係真的有輪迴,我都帶住呢個信念,期待媽咪同我下世再續母女緣。

暫別啦媽咪!我哋好快再會!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭