【聲明】港生活網站並無進行電話推廣活動

陳淑蘭
陳淑蘭

我的「終活筆記」

發佈時間: 2022/06/23

我的「終活筆記」

媽咪在生時,會暗示一啲對死後安排嘅諗法,可能老人家始終對講死亡有所忌諱,欲言又止;於是今次辦佢嘅身後事,要靠回憶佢嘅生活對白,了解佢嘅心意而行。

佢之前講過幾次想將骨灰灑落海,當我追問呢個係咪佢嘅意願時,佢又唔再畀反應我,完全唔再講。結果我無將佢嘅骨灰灑落海,原因係媽咪走嘅時候,肺積水令佢好似浸喺海底咁透唔到氣,辛苦咗好耐,我無理由再將佢放入海。欣慰嘅係,最終都搵到個望見海嘅地方安葬。

媽咪嘅身後事,係我最後一次為佢做嘅事,須盡力做到最好!過程中,要喺短時間內不停諗佢嘅意願有無遺漏,係有壓力㗎!不過好彩一切順利,我亦覺得媽咪滿意。

相信日後到我百年歸老,應該無人會好似我幫媽咪咁,逐樣追溯遺願安排,求人不如求己,一於人生最後一程由自己決定,做定「終活筆記」。

「終活」一詞來自日本,即係「為咗迎接人生終點所進行嘅準備活動」,最主要係清楚話畀人知,希望身後事想如何處理。就算自己突然離世,家人朋友亦唔會無所適從。

我嘅終活筆記,自己過身後,寶貝寵物一定要有妥善安頓,而家我已開始安排朋友或朋友嘅仔女同我啲寶貝貓、狗、鸚鵡建立感情,希望日後朋友願意照顧佢哋。

我亦開始留意一啲慈善團體,之後就算我唔再活喺呢個空間,都可以留一份心意畀有緣人。

喺幫媽咪安排設靈儀式過程中,發現原來喪禮都可以布置得好舒服、好靚。因為我啲朋友都好錫我媽咪,每次見面都會同我媽咪飲香檳,於是我就安排咗好多香檳,當佢哋喺靈堂前向我媽咪鞠躬後,就可以攞住杯香檳同佢乾杯告別。

我都會揀定鍾意嘅靈堂布置,等某一天,朋友嚟參加我嘅最後party!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭