黛安
黛安

合味道紀念館「火辣至抵組合」 麵食低至$2包

發佈時間: 2022/06/28

合味道紀念館「火辣至抵組合」 麵食低至$2包

合味道紀念館香港逢星期五會舉行「日清Friday BUY & TRY」,黛安收到風,紀念館最近更推出「$10、$20、$30火辣至抵組合」,大家可以指定價錢自選湯麵、撈麵同零食組合,例如唔同口味嘅「湖池屋激辣魔薯」、「拉王」非油炸即食麵同「IRVINS」撈麵等,部分麵食更低至平均每包$2,真係好抵啊。

另外,鍾意食辣嘅朋友有福了,因為日清推出咗多款熱辣麵食,例如麻辣鍋味「出前一丁北海道小麥粉」、日清Thai Signature系列及東南亞地道風味「福」包裝米粉等已經登陸紀念館,為「勇者」集合咗5種熱辣級挑戰口味,更可憑$120購買「夏日熱辣級挑戰」福袋,一次過嘗盡7款唔同程度嘅熱辣級日清產品。

公關姊妹仲話,紀念館除咗繼續辦各式工作坊外,為咗慶祝一周年紀念,更推出原創實景解密遊戲「福爾摩『清』」,大家搵出館長收埋嘅秘密,即可換取獨家限定福爾摩「清」遊戲簿同紀念印章,黛安都要約埋朋友一齊去玩下。

撰文: 黛安 消息特靈八卦公關
欄名: 八卦名利場