擦地板擦上癮

生平第一次擦地板，一擦上癮。見到擦完嘅地方乾淨咗，真係好治癒，加上擦完地後出一身汗，唔使畀錢去做瑜伽，仲可以令屋企地板乾淨咗。

日本人似乎習慣跪喺度用抹布擦地，呢一幕經常喺日劇上見到。喺日本，擦地板唔止清潔咁簡單，佢哋用擦地板從小去培養小孩子嘅品格，除咗鼓勵佢哋珍惜同打理屋企嘅環境，亦可以透過擦地板去鍛練小朋友嘅手指肌肉。

此外，擦地板亦係一門淨化心靈嘅修行。學生喺學校擦地板，主婦們喺屋企擦地板，喺道館修行亦要擦地板，因為入門擦地板係對場所同對技藝敬重嘅表現。

日本人用呢個方式擦地板有3大原因。

第一點係保護木地板。因為日本處於地震帶，所以日本房屋大多採用木質結構，而日本人習慣席地而坐，因此對地板嘅護理要求更高。用地拖拖地，水好難徹底整乾，因而容易損傷木地板，因此，日本人出於對木地板嘅保護，一直使用「跪地用抹布擦地板」方式，加上日本居住面積不大，用抹布擦會容易啲。

第二點係，「跪地用抹布擦地板」方式可以有效預防蠹蟲滋生，因為抹布可以更充分地扭乾水份，令木地板上不易滋生細菌。

第三點係由於日本居住面積較細，用抹布擦地板，可以節省用嚟擺放地拖同水桶嘅空間。

我善用時間，擦地板時順便搽厚厚嘅手霜，戴上一個貼手膠手套，再穿上正常手套，順便做埋hand mask。我呢把年紀，跪得耐膝頭會痛，於是我買埋護膝嚟做保護。

赤腳踩喺自己擦完嘅地板上行嚟行去，唔使畀錢卻畀到我好爽嘅滿足感，你有無興趣想試下？（本欄逢周四刊登）