中環夏誌免費玩30項活動 周六揭幕

一年一度嘅《SummerFest中環夏誌》今個星期六（16日）至9月18日，將會喺中環海濱活動空間舉行，黛安知道，今年呢個大型暑期節目會以「城中野」為主題，舉行近30項活動，市民可免費入場，享受海濱空間，齊齊歡度暑假。

公關姊妹話，今年中環夏誌嘅活動好豐富，包括香港知名藝術家鄧卓越全新創作「A Shoppin’Baby」民族系列嘅裝置藝術；亦有非牟利機構「霓虹交滙」展出經修復嘅餐飲業霓虹招牌，呈現和探討香港霓虹嘅前世今生等。

除咗多項常駐節目，活動期內逢周五周末及公眾假期，亦會推出多項特備節目，包括運動、電影及文化、音樂舞蹈、文青市集等，可謂動靜皆宜。黛安覺得最吸引係大會首度舉行戶外電影播映，讓大家可免費欣賞「超級無敵世界波」、「超級無敵羊咩咩大電影之天外飛咩」及「路易斯韋恩的迷幻貓世界」等合家歡影片。另外，喺中秋節前後亦會推出一連3日嘅「LOCOLOCO文創市集」，讓遊人歡度佳節。想知更多活動詳情，可參考《中環夏誌》嘅fb專頁。