太興33周年推新奶茶 Eric Kwok夥陳葦璇笑評新口味

最近「多元宇宙」成為新興話題，黛安知道，太興趁今年踏入33周年，都請咗品牌代言人Eric Kwok夥拍陳葦璇（Kira）走進多元宇宙，1人飾演3角，以連串搞笑情節為品牌標誌飲品「港式奶茶」拍新廣告，同時為大家介紹3款新出嘅奶茶，包括香芋奶茶、豆花奶茶及桃膠奶茶。

全新電視廣告已經登場，Eric Kwok喺廣告中面向Kira品評奶茶「靚」，結果引起美麗嘅誤會；被問到個人口味，佢就話最愛港式奶茶，茶底要夠濃入口要夠幼滑。最近Eric開始主持綜藝節目，敢於創新嘅理念正好同太興不斷創新嘅宗旨不謀而合，確實係品牌最佳代言人。

至於首次為品牌拍廣告嘅Kira就話好興奮，仲話本身都鍾意港式奶茶，「相信大家都好羨慕我可以分身飾演3個自己，一次過試晒3款奶茶。」被問到廣告中，Eric Kwok喺佢面前大讚奶茶「靚」嘅情節，Kira就開玩笑咁講：「無可否認新口味（奶茶）的確吸睛，難怪Eric Kwok只愛奶茶不愛美人！」見到佢哋喺廣告內外都充滿火花，真係有趣。