【聲明】港生活網站並無進行電話推廣活動

陳淑蘭
陳淑蘭

生死教育

發佈時間: 2022/07/28

生死教育

過咗人生大半世,身體多咗退化毛病,多咗接觸生離死別,欷歔同感慨都多咗,因此諗多咗生同死嘅意義,亦留意多咗有關生死教育。

長期以嚟,死亡係生活中嘅禁忌話題,社會上甚至有「恐4症」,選擇手機號、車牌號、電梯樓層時都盡量避開用「4」呢個數,尤其係老人家更加少談論死亡呢個字,所以一旦面對親人死亡時往往會不知所措。

呢兩年身邊實在有好多人離世,令我諗到死亡到底離我遠定近呢?亦因為咁,從死去思考生,希望喺嚟緊嘅日子可以領悟多啲。咁啱畀我見到一本引導人勇敢面對生死,名《生死奧秘》嘅書。呢本書教人點樣去尋求靈性協助而完成善終。

睇呢本書,係希望幫助我對於未來嘅必經之路有心理準備,學習對人同對自己都能夠進行愛的功課。正如書中所講︰「如果我哋無準備好面對死亡,就如同無準備好面對生命。」生命無take two,日子一日一日咁過,了解多啲自己對生命嘅價值,可以圓滿此生,雖然喊住嚟到呢個世界上,希望可以笑住咁離開。老實講,我唔係完全領略到書中所講嘅嘢,都有好多思考盲點。都好嘅,至少諗下嘢,畀個腦運作下,無咁易腦退化。

人類世世代代尋找生命真諦,或者死亡正正係生命意義所在,正因為有終點,人先至會努力不懈喺到達終點前,完成人生目標。

無人知道係咪真係有「來世」,但至少我哋要善待現世嘅光陰,保持開放心態。若能從認識悲傷中搵到應對之道,更可以幫助自己以及所愛嘅親友,早日走出傷痛;唔單止治療身體疾病或者心病,都可以對「症」下藥,令自己更加珍惜生命。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭