K11「科藝同行」領袖先導計劃 為基層學童提供免費科藝體驗

為咗向基層學童及青少年提供更多接觸藝術文化及創作嘅機會，黛安聽聞，K11 MUSEA邀得源慈善基金及香港多媒體設計協會合辦《「科藝同行」領袖先導計劃2022》，由即日起至9月中，畀大約600名6至16歲嘅學童，免費透過藝術導賞團及科藝工作坊，提升對相關範疇嘅認識和興趣，為佢哋嘅藝術發展作準備。

呢個「科藝同行」計劃包含一系列藝文體驗活動，學員有機會參觀於Art Karnival中展出嘅博物館級藝術展品，了解作品設計理念及創作過程，亦可以喺「ART TECH Plus創作工作坊」認識近年風靡全球嘅非同質化代幣藝術品（NFT，Non-Fungible Token）等，仲可以喺導師帶領下親身製作獨一無二嘅NFT作品㖭；另外，學員亦可以喺「數碼藝術創意工作坊」學習以電子繪圖方式繪畫等。