滙豐招聘逾350畢業生 積極豐富本港人才庫

一眾莘莘學子又畢業喇，黛安聽公關姊妹講，滙豐今年招聘咗超過350名剛畢業嘅大專生和暑期實習生，其中45%仲係女性㖭，上星期就邀請咗超過100位新同事參加迎新活動，大家都好開心可以加入呢個大家庭。

姊妹話，呢批畢業生來自亞洲、英美等30間大專院校，佢哋會加入財富管理及個人銀行、工商金融、環球銀行及資本市場等部門。滙豐香港區行政總裁林慧虹喺席上歡迎各位年輕同事，佢話香港係一個充滿活力嘅國際城市，要提升香港連繫全球、貫通東西方嘅優勢，人才係重要基石，就好似呢批新同事一樣，幹勁十足，希望各位新同事勇於發問和嘗試，發揮團隊合作精神。

唔講唔知，滙豐除咗聘請畢業生和提供暑期實習機會外，自1965年以來亦推出多項獎學金，至今已經頒贈咗逾$2.52億獎學金呀！