生命戰士ONJ

聽到Olivia Newton-John喺8號早上離世，心中即刻一沉，年輕嘅美好回憶年代又有人走了。

嗰日家中兩個工人姐姐，一個擘大喉嚨不斷唱Hopelessly devoted to you，另一個就physical, I wanna get Physical。大家一邊懷念ONJ，一路好有興致咁唱佢嘅經典金曲，我都不甘寂寞，唱佢首《Xanadu》。

1980年上映嘅《仙樂都》，我去咗當時被譽為全港唯一最豪華商級嘅碧麗宮戲院睇；個感覺更似入咗仙樂都，更加飄飄然。之後仲特登去學埋滾軸溜冰。諗起呢啲回憶，嘴角上揚但心情下沉，因為往事只能回味。

大家認識嘅ONJ除咗係一位國際巨星外，亦係一位出色女商人。1981年佢發行咗熱門專輯《Physical》，第二年就創辦咗運動服裝企業Koala Blue，後來擴展做埋女裝、葡萄酒、床上及沐浴用品。巔峰時期，佢公司每年銷售額逾2,500萬澳元，可惜1991年申請破產。但呢件事無打沉佢嘅志氣，當時佢發表一份聲明指，係因為佢哋擴張得太快，碰啱遇上經濟衰退，因此受到傷害。

佢嘅勇敢唔單止係面對公司破產，1992年佢確診乳腺癌，2013和2017年復發，佢都一一克服並將呢份抗癌勇氣化作大愛，於2012年喺墨爾本Austin Hospital開設Olivia Newton-John Cancer Wellness and Research Centre，成立相關嘅基金會贊助自然療法和癌症嘅研究。當然，仲有好多講唔完嘅事業同公職，以上種種可以睇到佢係一個熱愛生命嘅戰士。（本欄逢周四刊登）