陳淑蘭
陳淑蘭

九龍城「往事只能回味」?

發佈時間: 2022/08/25

九龍城「往事只能回味」?

你聽過尤雅姐姐唱嘅名曲《往事只能回味》嗎?呢段時間,呢首歌成日喺我腦海中出現,因為實在有太多陪伴我成長嘅生活方式、店舖、環境都經歷咗時代變遷。

年輕時無咁多感觸,唔知點解去到40歲尾,一聽到熟悉嘅環境或人消逝就會好欷歔。

記得喺媽咪80幾歲時,同佢去紅館睇吳鶯音前輩嘅演唱會,媽咪一邊睇一邊流淚,佢話啲歌令佢想起年輕嘅一幕幕片段,而家我都開始有呢啲緬懷。

市區重建局喺今年5月,宣布啟動九龍城區「衙前圍道/賈炳達道發展計劃」項目法定規劃程序,重建範圍包括龍崗道與侯王道間的主地盤、北面賈炳達道公園部分土地,以及鄰近太子道東、打鼓嶺道與啟德道間的東面地盤。項目總計涉及3.7公頃土地範圍內123個街號的樓宇,預計受影響業權及住戶數量分別約為1,007個與820伙。我唔係九龍城居民,都已經有唔捨得嘅感覺,可想而知同九龍城息息相關嘅朋友會幾難過。

真係好鍾意九龍城,喺港台做完節目,就落九龍城搵食,每次我喺屋企請客,都會去九龍城買餸。我啲朋友好叻,食得出食材正唔正。如果我叫工人姐姐去其他地方買餸,真係無咁好味,可能就係少咗嗰份人情味,因為店主必定幫我揀啲最好嘅。喺九龍城,煮乜餸嘅調味料都有齊,應有盡有,買嘢兼吹水,真係一件賞心樂事。

唉,唔知可以有幾多間老店傳承落去呢?一個咁有歷史回憶嘅地方會變到點呢?第時仲可唔可以喺九龍城捕獲發哥呢?

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭