【聲明】港生活網站並無進行電話推廣活動

陳淑蘭
陳淑蘭

駝背顯老 女性比男性嚴重

發佈時間: 2022/09/01

駝背顯老 女性比男性嚴重

疫情持續咗近3年,「吽」喺屋企嘅日子裏,日日攤喺張好舒服嘅豆袋椅追劇。當終於可以出街見朋友,個個一見到我都話,做乜我而家駝背?簡直係當頭棒喝,晴天霹靂!我一直都警惕自己老嘅時候唔可以駝背!但竟然不知不覺間變駝背!駝背會令人睇起嚟起碼老10歲!Oh no!

好多前輩,例如四哥謝賢、何B師父、秋官鄭少秋同我阿媽都好襟老,其中原因就係大家行出嚟都係腰板挺直。當長期姿勢不良就會導致駝背,除咗體態唔好睇和顯老外,睇落亦好無精神,仲會對脊椎造成負擔。

正常人的胸椎中度向後彎曲,其角度大約介乎20-29度。隨着年紀增加,胸椎過度出現向後彎曲就會出現駝背。步入中年後會逐漸增大,40歲以後更加速變化,55-60歲時約介乎43-52度;76-80歲時駝背角度大於52度。因此,老年人約20-40%會發生重度駝背,發生率隨着老化而逐漸增高,每增加10歲,發生率就增加6-11%,女性比男性更早發生,也更嚴重,所以我哋要及早提醒自己留意呢個問題。

因為重度駝背會增加動作能量消耗,容易疲累,影響基本功能同日常生活起居動作,亦令胸廓嘅擴展活動變差,減低肺活量,影響肺部換氣功能。重度駝背會增加脊椎體嘅承受力,平衡功能變差,增加跌親風險,仲會引起其他相關嘅病況。下期我會同大家分享點樣避開呢個陷阱,大家互勉之。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭