Audrey Ng
Audrey Ng

做家務要畀零用錢?

發佈時間: 2022/09/07

做家務要畀零用錢?

孩子已經5歲,會幫手做家務,例如晾衣服、收拾桌子、拖地、洗碗等。

一些長輩知道孩子做家務,問他︰「你咁乖幫手做家務,媽媽有無畀零用錢你?」聽過幾次後,孩子真的跑來問我要零用錢。

上一代人習慣以零用錢或禮物做獎賞,鼓勵孩子做家務、用功讀書。我也是在這樣的教育方式下長大,所以深明這種方式的弊端,就是沒錢的時候,我一定不會做家務。

事實上,做家務是每個家庭成員的義務,家長不宜把零用錢和孩子應付的責任掛鈎。所以,當孩子問可否在家務後給他零用錢,我直接告訴他沒有,原因是我們都是家裏的一分子,有責任分擔家務。

我問他︰「你記得昨晚邊個煮飯嗎?食飽邊個執枱?邊個洗碗?」

孩子答得很快︰「你煮飯,爸爸執枱和洗碗!我有幫手抹枱!」

「係呀,我都記得你主動幫手呢!你點解要抹枱?」

「因為我唔想張枱咁污糟,會有老鼠曱甴!」

「你講得好啱呀!多得你將枱抹得咁乾淨,屋企先無曱甴!而我煮飯的原因,就係怕你們肚餓;爸爸見我煮飯攰,於是幫忙洗碗。一家人分工合作,屋企先咁整潔!」孩子對於自己有份出力,一臉滿足。

「定係你覺得大家為咗零用錢先做家務?」我補問一句。

「唔係,一家人應該分工合作!」孩子已學着我的話。

家裏沒有工人,孩子自小看着我們親力親為處理所有家事,了解到為家人煮飯、打掃屋企,是基於對家人的關愛而非金錢利益。

用錢或禮物作為學習和家務獎賞,只是短暫有效,當這些獎勵消失,孩子的動力便會消失;相比起實質的獎勵,家長的稱讚、建立孩子對家庭的歸屬感,更有效提升他們的積極性;而且別忘記,讀書本來就是他們的責任,家務是對家庭的義務,用獎勵誘惑,反而令本來的動機失焦,得不償失啊。

(本欄逢周三刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路