陳淑蘭
陳淑蘭

行路姿勢錯誤影響深遠

發佈時間: 2022/09/08

行路姿勢錯誤影響深遠

我駝背嘅原因,除咗因為之前日日用死蛇爛鱔姿勢,攤喺豆袋椅追劇,另一個原因就係我嘅行路姿勢出咗問題。枉我曾經做過模特兒,你幾時見過一個駝背嘅model行天橋?無錯!因為呢個疫情,我無乜興致去扮靚,出街都係孭住個背囊頭耷耷,成隻縮頭烏龜咁!為咗要改善駝背,從今日開始,我要再次行出模特兒嘅步姿!

走路姿勢如果含胸駝背、頸部錯位、走路拖拉、臀部下垂,咁就算你有再好嘅樣貌同身形,都會大打折扣。其實好多人,甚至小朋友都去上模特兒課程,並唔係一定想做模特兒,而係透過課程去訓練身體嘅協調性及行路姿勢,例如寒背、入字腳、八字腳、拖腳行路等等。

帶住壞習慣日行萬步,可能令身體有機會受傷,又或對身體造成額外負擔。

日本中京大學運動科學部教授、醫學博士湯淺景元,就喺《正確的走路法》呢本著作中表示,如果平常有肩頸或膝蓋痛、腰痛等問題,都可能係因為平常慣用錯誤姿勢所導致,如果唔矯正姿勢,恐怕對關節、肌肉有傷害隱憂。

物理治療師簡文仁亦提醒,行路常見錯誤姿勢有兩種︰一係彎腰駝背、姿勢不正確,對腰部造成沉重負擔;二係走路太急,只用腳尖着地。缺乏運動或常穿高跟鞋嘅人,容易不自覺咁用腳尖行路,如此一來,腳踝同埋膝蓋要承受全身體重嘅力度不夠平均,容易令關節受傷。

因此從今日起,我要挺起胸堂,用正確姿勢自信咁行我嘅下半人生路!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭