陳淑蘭
陳淑蘭

愈艱難愈要笑一笑

發佈時間: 2022/09/29

愈艱難愈要笑一笑

你有無發覺,無論你乜嘢年紀、地位或輩分,一旦同識於微時嘅朋友或同學相聚,一齊分享童年回憶時,就即刻變得調皮活潑。我契爺個同學係一位不苟言笑嘅法官,但當佢同契爺講番佢哋細個時嘅頑皮事迹,之後大笑一餐時,體內嗰個「頑童」就好似跑咗出嚟咁。

我小學5年級時,爸爸帶我同媽咪去星馬泰,參加佢來自世界各地同學嘅同學會。我爸爸好大年紀生我,當時佢好多同學都已經係阿爺阿公,有啲行動都唔係咁靈活。但當佢哋講番細個時踢波嘅威水史,即時又可以示範彈幾下,睇到我眼都大埋,但我睇得好enjoy,我好鍾意睇到佢哋笑作一團嘅氣氛,嗰份快樂即刻感染到周圍嘅人。

我自細就好鍾意同大家一齊笑,可能因為咁,我細個時已經懶詼諧或者搞搞震,目的只係想博大家開心,因為你開心時,我就最開心。

你有無計算過你幾耐無大笑過呢?呢幾年嘅社會生活愈嚟愈困難,心情愈嚟愈沉重,可能真係好難笑得出,但係笑真係一帖好好嘅良藥。佢會令你腹部收緊,加强心臟活動,經常微笑仲可以提高免疫力。真係要令歡笑成為你生活嘅一部分,絕對值得練習笑㗎。

當你一個人嘅時候,試下笑幾聲,愈真實愈好,試下開始3聲短暫嘅「哈哈哈」,逼自己笑幾次,你就會由假笑真係自發咁笑出嚟,而一旦從大腦最前嘅額葉接到我哋想笑嘅信息,佢就會發出令我哋笑嘅訊號,引發大笑生理反應;即係話,大腦嘅邊緣系統已經啟動咗笑嘅生理反應!

希望多啲人笑笑笑,將世界變得更美妙!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭