藝人的親民形象

前排有網友指要求同鍾嘉欣影相時，鍾拒絕對方，隨後好多自稱係佢街坊嘅網民力數佢多宗罪，直指佢平時同電視裏面好nice嘅形象係兩個樣。因為呢件事，開始有網民盤點邊啲藝人有唔親民嘅表現，亦分享邊個係非常親民嘅藝人，其中阿姐兩邊都有入選，咁即係點？阿姐究竟算係親民定唔親民？

以我呢個後輩見到阿姐汪明荃，覺得佢真係好有阿姐嘅懾人風範，見到佢自然會肅然起敬。我絕對覺得佢屬於親民一族，不過就唔係好似我呢款烚熟狗頭，對住個個都懶熱情。佢無擺阿姐款，待人以誠。當然，我估如果遇上無禮貌嘅人則除外。好似周潤發，夠親民喇啩？合照多數無托手踭，但見過有幾張佢黑面嘅相片公諸於世，原來係遇上一啲無禮貌嘅市民，喺唔合時宜嘅地點、時間夾硬夾住發哥影相，如果你係發哥，你笑得出嗎？

我唔係大明星，有人搵我合照，我簡直飯應，但係我都有試過無表情，無理到街坊嘅邀請合照，直行直過。原因係我正趕住去搵廁所辦大事，偶一停頓，我真係擔心會出大事。呢個苦衷，你會接受嗎？

不過真係有啲路人會好無禮貌咁要求同藝人合照，遇上呢啲街坊，雖然我都好恨仲有人搵我合照，但態度惡劣嘅話，對唔住，我真係接受唔到。

我認為對任何行業嘅人都應該有禮貌，呢個係對人最基本嘅尊重，你認同嗎？

（本欄逢周四刊登）