放屁需要畀稅？

你細個時有無聽過呢個粵語童謠？「屁，係肚中之氣，放佢出嚟遊晒天地，鬼叫你咁貪心，聞咗我個屁，索咗入個鼻，我要你賠返二両四。」喺現今世代，已經變咗，放屁嗰個要賠錢，而且唔止賠二両四。

新西蘭係畜牧業發達嘅國家，羊和牛嘅總數量係人口嘅6倍，世界人均甲烷排放量亦係最高嘅國家。2022年5月16日，新西蘭政府提出溫室氣體減排計劃，其中對農業部分提出向畜牧業徵收「甲烷排放稅」，藉此達到溫室氣體減排目的。

徵收呢個甲烷排放費用，外界稱之為「放屁稅」（fart tax），將來會唔會去到連人放屁都要畀呢個稅？如果呢日真係來臨，我一定破產。

我本身嘅消化系統應該唔係咁好，食飯時又鍾意講嘢同大笑，因此臨瞓前就開始噼噼啪啪咁放氣。朋友笑我食飯時不停講嘢大笑，吸晒啲氣入體內，所以要排返出嚟，唔知呢個講法有無根據呢？

專家話，食嘢、飲水、甚至吞口水，都會同時吞入一啲空氣。而食物喺腸胃中消化時亦會產生氣體，身體就會以打嗝或放屁形式將呢啲氣體排出。食咗難消化嘅食物，又或者自身消化系統有問題、有壓力、便秘或腸道細菌嘅改變，都會令人放好多屁。

所以我特別鍾意同好朋友一齊食晚飯，喺佢哋面前，毫無保留咁盡情放屁，令個肚扁返晒，真係舒暢無比。腸胃專家都話，唔同屁味可以知道腸道嘅健康情況，既然係咁我會繼續放屁，永不放棄！

（本欄逢周四刊登）