鮑起靜正能量滿瀉

台慶劇《下流上車族》終於全劇播畢，貼地劇情加上眾演員嘅出色表現，成績相當不俗。其中有我最喜愛嘅鮑起靜，我真係好鍾意睇鮑鮑做戲，佢令角色注入生命，活靈活現，就算遇到一啲平平無奇嘅角色，佢都可以將角色人物起死回生！

如果要讚佢嘅演出作品，洋洋萬字都不能盡錄，但我一定要講鮑鮑喺電影《殭屍》做梅姨呢個角色！鮑姐演出真係好感動，尤其一個shot直落幾個表情，簡直係示範級演技，睇到我毛管豎起，心都寒埋！佢憑呢個角色獲提名「最佳女主角」，奈何最終敗給章子怡，但喺我心目中佢就係影后！

我除咗係鮑起靜嘅fans，仲有幸同佢做到friend！之前我有個好朋友，同方平係非常要好嘅朋友，所以我哋差唔多個個星期見面，我哋成日有機會品嘗到鮑鮑嘅廚藝，口福無邊。

除咗佢老公、佢個女，作為朋友，個個都愛佢，因為佢好鍾意笑，講嘢嘅語氣溫文爾雅，大方有禮，待人真誠，對動物愛護有加，對住佢真係要將：「叮噹呀，誰都喜歡你，小貓也自豪！」轉歌詞為︰「鮑鮑呀，誰都喜歡你，蘭子也自豪。」

我愛鮑鮑，也愛鮑方叔。我雖然拍得劇少，但好幸運能夠同鮑方叔一齊做《九彩霸王花》。鮑方叔係一個好有內涵、風度、慈祥嘅前輩，同埋好鍾意笑嘅前輩，同鮑鮑一樣，有親和力，令周圍嘅人都如沐春風，正能量滿瀉。所以喺我心目中，鮑起靜無論係事業、家庭、人際關係，成績都係超班！絕對活出女人嘅風采！

（本欄逢周四刊登）