由怕雀仔到養雀

上周講到我有密集恐懼症，此外，我啲朋友都知我好驚尖嘴動物或禽畜，例如雞同雀，如果一隻好多顏色嘅尖嘴「嘢」突然殺出嚟飛到我面前，我諗我會即時嘔白泡身亡！死前可能尖叫一聲先！所以，當朋友知道我而家養咗雀仔，佢哋都好驚訝。唔好話佢哋覺得詫異，連我都唔相信自己會養雀！

事緣3年前某一日，我返屋企經過管理處時，經理話我工人姐姐喺屋企發現有隻雀仔（和尚鸚鵡），佢放咗喺管理處，等無人認領，就問准我可唔可以養。唔使諗！佢同我做嘢20年，有乜理由我會養雀仔？不過當我見到隻雀仔時，咦？我近距離同佢接觸我竟然唔打冷震喎，仲覺得佢好得意，最緊要係睇到資訊話鸚鵡入宅係吉祥好運，象徵有喜事來臨。有好嘢，一於問晒無人認領後就據為己有，仲幫佢起個吉名叫「福來」。

呢隻雀仔應該係好鍾意咬人，所以先畀人放走。我養咗佢一年多，佢依然啄到我出血，但就好鍾意我工人姐姐，唔咬佢。終於有一日，佢自己唔知點樣，開門自己飛走咗。工人姐姐真係傷心到喊，我同佢講，我哋去買一隻唔會咬我嘅新BB雀。

果然由BB開始養，佢哋會好黐人，跳「求奶舞」時，上下振翅配上規律嘅震動，乍看好似裝咗電池嘅絨毛玩偶咁，好鬼得意。再加埋和尚鸚鵡有卓越嘅語言學習能力，時時我一句，佢又跟住講一句，以及有認人嘅能力，證明佢哋個腦袋細細，真係幾聰明。搞到我開始鍾意咗呢款雀仔，再養多一隻㖭。

唔知有無一日，我會有機會連其他種類嘅雀仔都唔驚呢？所以話，世上真係無絕對，一切隨緣。

（本欄逢周四刊登）