楊紫瓊帶來的啟示

恭喜楊紫瓊榮獲金球獎。佢話自己做咗演員近40年，過去經歷嘅人生旅程就似一場偉大嘅鬥爭。隨着年齡增長，女演員嘅戲路愈嚟愈窄，於是佢跳出以往觀眾對佢嘅固有印象，由武打女星嘗試轉其他戲路，例如搞笑、悲傷、認真等等嘅角色，得到呢個獎，佢終於體會到被認可嘅感覺。

楊紫瓊攞到呢個獎，唔單止佢開心，對我嚟講都有無限嘅鼓舞。由佢身上可以睇到，女人哪怕年過花甲，只要勇於廣闊自己眼界，忽略世俗眼光，相信自身嘅努力、自信、正能量，依然能活出最美好嘅樣子。

想要活得年輕，一定要懂得調整心態，喺我哋生活中有好多事情都係因為沒有掌握正確方法，才會令自己活得唔開心，所以一個人嘅心態非常關鍵。今時今日，仲有人問我點解仲咁低能？（可唔可以客氣啲，稱之為童心呢？）我真係仲保持住童心㗎！童心之所以純真，就因為簡單，而簡單就係快樂之源，想令自己遠離憂傷，最好令自己保有一顆童心。唔好有太多遏抑，唔好有過多思考，簡單就好。

女人活到一定年紀，最重要活得「自在」，想變靚絕對有心得㗎！一、要持續鍛練，令身材保住美態；二、要保持樂觀心態；三、不要放棄打扮自己嘅儀態。女性對年齡嘅焦慮非常敏感，我哋要同年齡焦慮和諧共處，將焦慮化為勇氣，呢個就係做人嘅藝術。

走過歲月，走過青春，邁向人生下半場，邊個話我哋唔可以美在老年？所以最緊要保持心境正面！開心！

我真係恭喜你︰青春常駐！

（本欄逢周四刊登）