陳淑蘭
陳淑蘭

父子情變兄弟情

發佈時間: 2023/02/02

父子情變兄弟情

近期喺無綫睇到下午重播講父子情嘅電視劇《巴不得爸爸》,故事係講個仔跨越時空,返去父親年少氣盛嘅60年代,由父子情變咗兄弟情。咁啱我喺Netflix睇到陳可辛導演嘅《新難兄難弟》,又係同一個故事架構。

最得意就係《巴不得爸爸》父親陳錦鴻叫楚帆,個仔吳卓羲就叫楚慈;而《新難兄難弟》,父親梁家輝叫楚帆,個仔梁朝偉叫楚原,大家都姓楚。

《新難兄難弟》,戲中父親梁家輝時時講嘅︰「我為人人,人人為我。」係1953年電影《危樓春曉》中吳楚帆飾演富正義感的士司機威哥嘅口頭禪;陳可辛嘅《新難兄難弟》係向《危樓春曉》致敬。呢套電影故事反映當時20世紀50年代,早期香港艱苦嘅社會生活以及種種不合理現象,戲中窮人雖然生活悲涼,但只要團結互助就能共度難關,亦可能因為咁《新難兄難弟》主角叫楚帆,順便向吳楚帆致敬,真係好有心思!

好嘅故事真係唔怕抄蹺,正所謂「蹺唔怕舊最緊要受」,道理同真理永不變,最緊要喺唔同年代學識變通,舊瓶又可以變成新酒。不得不讚嘅係陳可辛,大導演即係大導演,喺佢電影裏面嘅人物,既寫實又好仔細,人物故事能深入人心,所以觀眾睇嘅時候會被感動,原來情感描寫唔一定要落淚,我一邊睇,一邊感受到窩心嘅溫暖。人情味就係會令人感到幸福。

如果你未睇過《新難兄難弟》我推薦大家睇!睇咗亦可以再睇,其實我之前都睇過兩次,年紀唔同咗再睇,又會發現一啲新嘅領悟。所以我亦會去搵返《危樓春曉》嚟睇下至得!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭