陳淑蘭
陳淑蘭

年紀大記性壞?

發佈時間: 2023/02/09

年紀大記性壞?

身邊好多朋友中完新冠後,都話自己康復後有腦霧問題。以前真係無人講呢兩個字,究竟乜嘢係腦霧呢?腦霧係一種神經症狀,形容大腦運作出咗問題,如同陷入迷霧般,令思考、專注力同理解力都大幅下降,不過腦霧並唔係一種疾病,而係一種症狀同現象。

根據國外醫療保健媒體Healthline嘅資料,常見腦霧症狀包括︰記憶力出問題(例如突然忘記自己喺邊)、專注力下降、頭痛、頭暈、無法靜落嚟思考、憂鬱和焦慮。有啲病人嘅理解力下降,甚至無法理解口述表達嘅內容,只能靠文字溝通。

我無中過新冠,但以上症狀好似我都中咗4項,不過我一直懷疑係因為自己開始有腦退化,好驚呀,究竟係乜原因令我記憶力衰退呢?如果我真係長命百二歲,往下嘅人生路係咪要喺「霧」中矇查查咁行落去?

記憶力變差,有機會係因為壓力、情緒焦慮、憂鬱而導致注意力唔集中所引起。對壓力愈敏感,身體會分泌愈多壓力荷爾蒙,俗稱皮質醇。佢可以調節身體免疫系統,但身體經常處於高壓,令皮質醇持續釋出,除咗影響心臟同皮膚,亦會影響腦部海馬迴體積大小,令記憶力受損。

而家我嘅口頭禪係︰「年紀大,記性壞。」係咪真?有無得救?日本知名AI同腦科學專家黑川伊保子,喺佢嘅著作《成熟腦︰大腦從56歲開始決勝負》中提出一個概念︰大腦會以7年為一個階段進化,小朋友大約喺14歲時能以大人方式思考,接住要花28年嘅時間,學習各種知識和經驗,仲有嘗試錯誤。然後喺56歲,達到大腦成熟巔峰!即係話大腦不但唔退化,仲有得進化,想知玄機?下期話你知!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭