中年腦可否變聰明？

後生時無記性唔覺有問題，經歷過媽咪之前有腦退化，照顧佢嘅時候開始好驚他朝有日我都有呢個症狀出現，點算？唔想咁樣可以點樣？於是我開始搜羅食唔同supplement去補腦，不斷參考不同資訊，做得幾多得幾多啦。

隨住老花、五十肩、白頭髮、皺紋、富貴包、膝頭哥痛，再加上記憶力下降，青春不再，其他身體部分都可以去鍛練改進，咁個腦袋又得唔得呢？

近年腦科學研究帶嚟好消息。科學家發現中年腦（約40-68歲）意外地能幹、有才華，我哋可變得更聰明、冷靜同快樂。雖然到咗中年，學習新事物速度較慢，需較長時間上手，但只要學識咗，表現可以同年輕人一樣好，而且中年人擅長整合過去嘅經驗，運用能力會更好。

科學家掃描年輕人同較年長者嘅腦，發現年紀愈大杏仁核愈唔會對負面嘅事起太大反應，大腦會自動增強正向信息，減負向信息，即情緒中樞杏仁核到中年後無咁活躍，令人唔再咁情緒化，阿Q咁講，個腦有啲退化都唔係無好處。

做身體檢查時可檢查埋個腦。目前有愈來愈多方法為大腦健檢，除咗傳統嘅量表外，亦加入一啲客觀測量方法，包括MRI磁振造影，以及愈來愈多專家發展特殊嘅認知活動，透過一啲行為表現評判及捕捉更多同大腦健康狀態有關嘅狀況。

其次係優質睡眠真係好重要，因為睡眠時候腦細胞之間嘅間隙會變大，令腦脊髓液比較容易將腦中嘅垃圾代謝出嚟，一旦睡眠不足，腦部就無法正常運作去清理垃圾，廢物不斷堆積，就會令思想唔通。

係喎！因為我超級鍾意瞓覺，所以而家雖然我嘅記性差咗，但係應變能力都仲係頂得住！（本欄逢周四刊登）