發放正能量

前兩日我喺彌敦道行緊嘅時候，有位一直收聽《開心日報》嘅女士走嚟我身邊同我講，多謝我哋每位主持人喺節目中不斷發放正能量，佢不斷咁喺度多謝我，眼角流淚，佢話佢好感動。

其實當時我更加感動，原本我嗰日屋企成幢大廈爆水喉，我成個停車場內嘅物品都濕晒，加上我哋出入揸車都要用車，當時車場電梯浸晒水，起碼有一段時間無得揸車，加上唔知幾多日先有食水用，所以當時嘅我心情真係灰過大灰熊。遇上呢位有聽我哋節目嘅聽眾，走過嚟同我分享佢嘅感受，我真係感動到喊，不過眼淚在心裏流啫。

可能有人會問我，其實你係咪真係咁開心？時時都喺度笑，又喺度講正能量！

如果我一直唔將好嘅信息入落我個自律神經以備不時之需，你覺得我真係可以笑得出咁耐咩？你有無聽過啲人話︰「重要事情要講3次！」正能量呢樣嘢咁重要，點只要講3次？要每日講到身體內外都要接收到呢個信息至得！

畀個例子你。假如你係一個基督徒，點解你要返教會聽福音？因為當你受傷或受到試探時，你平時入咗腦嘅經文或道理就會成為你嘅保護，喺你懦弱時畀能量你。無論你有任何宗教，時時keep住你有信念，力量都強大啲！如果能夠互相勉勵，互助互愛，你話個世界係咪無咁灰呢？

施比受更為有福，我好開心能夠同人分享我嘅開心同正能量。他朝有日，希望我可以好開心同人分享我嘅錢財！應該會等到呢一日！（本欄逢周四刊登）