黛安
黛安

JR《GIANTS︰Rising Up》@海港城 亞洲首個GIANTS作品 即日起展出

發佈時間: 2023/03/14

JR《GIANTS︰Rising Up》@海港城 亞洲首個GIANTS作品 即日起展出

最近海港城邀請到法國著名藝術家JR,喺海運觀點展出其亞洲首個GIANTS系列作品:《GIANTS︰Rising Up》。黛安聽聞,呢個人像公共藝術裝置係以巨型跳高運動員為創作藍本,捕捉運動員躍起嘅瞬間,猶如飄浮半空向後仰望壯麗嘅維港,展期由即日起至4月23日,免費入場㗎。

今次係JR繼2012年後再度喺香港展出藝術作品,JR分享︰「今次嘅創作靈感源自2016年巴西里約奧運會上嘅GIANTS藝術裝置。整個騰空動作就如鼓勵大眾勇於跳脫框架,跨越及完成更多目標。」當年佢喺里約展出3個以運動員為題嘅攝影藝術裝置,勾畫出運動員嘅比賽英姿,備受公眾讚賞。今次佢用上一貫嘅黑白型格風,將照片印製喺帆布再掛喺精密嘅支架上,仲喺裝置加入香港傳統「竹棚」,創造出香港獨有嘅藝術品。

海港城更請來香港女子跳高紀錄保持者楊文蔚Cecilia,率先欣賞藝術裝置及拍攝宣傳相。Cecilia話︰「感激JR選擇咗香港,選擇咗跳高,希望大家能感受到跳高嘅優美!」

撰文: 黛安 消息特靈八卦公關
欄名: 八卦名利場