會展翻新多項設施 迎國際大型展覽回歸

隨住疫情受控、香港全面通關，各式各樣大型展覽亦回歸香港！會展管理公司董事總經理梅李玉霞Monica昨與傳媒分享，自防疫措施撤銷後，好多展覽活動迅速復常，例如剛舉辦完嘅Art Basel就好哄動，吸引唔少藝廊參展，到訪嘅藝術迷亦絡繹不絕。Monica話疫情前，會展每年舉辦超過110個展覽，當中逾70場係國際大型展覽，包括珠寶展、美容展等，雖然疫情期間有啲展覽移師鄰近地區舉行，但香港復常後已迅速回歸，「部分參展商讚香港會展業嘅軟件和硬件都有優勢，今年多項B2B（企業對企業）展覽都返晒嚟，我哋真係好開心！」

回顧過去3年疫情，Monica坦言對香港國際會展業打擊大，但佢哋喺「黑暗時期」亦未有鬆懈，仲不斷反思如何將會展業做得更好，並趁疫下翻新多項設施，包括展覽設施、防火設備、燈光、近1,000個廁格等，同時更換咗7台製冷機，以減少碳排放，為迎接業界復甦做足準備。