在職青年等父母畀零用錢

喺Pantry遇到IT Team嘅Mike，一面沖杯麵，一面唱歌仔。曉陽就問，中午只食杯麵，真係夠飽？Mike話無辦法啦，因為今個月嘅錢已經用晒，屋企人又未畀零用錢，所以只好食住杯麵先。

曉陽聽完即刻「黑人問號」，零用錢？有無聽錯？Mike雖然係啱啱畢業出嚟做嘢，但人工唔算太差，所以點計都應該自己夠錢用，竟然仲收零用錢？

追問之下，原來Mike屋企得佢一個仔，萬千寵愛，所以Mike父母一直將佢照顧得無微不至，就算大學畢業後都一直每個月畀零用錢，等佢可以做自己想做嘅嘢，唔使為兩餐憂愁。

曉陽就問Mike，咁每個月人工用咗喺邊度？Mike就話交租用咗三分之二，剩低就用嚟食飯行街買衫睇戲，偶爾去下旅行。

生活模式果然同時下年輕人一樣。不過，每個人嘅生活都有自己一套，曉陽唔會話邊個啱邊個錯。

根據一間獨立研究金融公司喺外國嘅一個調查顯示，近70%育有18歲或以上孩子嘅父母，仍然會為佢哋嘅子女提供經濟援助，所以Mike並唔算係特殊個案。

只不過，長遠父母畀零用嘅日子可以維持幾耐？

曉陽就問Mike，佢父母年紀幾大？原來都已經50出頭，講得好聽啲，就仲有十幾年先退休，但好多嘢都話唔埋，畢竟父母始終有老嘅一日，佢哋都需要儲定啲錢為退休作打算。

曉陽問Mike，有無諗過調轉養返父母，Mike都好孝順，話自己都打算過多幾年等人工高啲就儲返部分錢畀阿爸阿媽。雖然呢個過幾年嘅安排，唔知會唔會真係實現，但如果Mike嘅父母知道，起碼可以安心退休。

（本欄逢周四刊登）