陳淑蘭
陳淑蘭

為保護地球出一分力

發佈時間: 2023/04/27

為保護地球出一分力

我哋人類日積月累嘅所作所為,對自然環境造成巨大嘅影響,海洋污染、土地沙漠化、空氣質素惡化、生物多樣性遭到破壞,亦因為咁我哋睇到天災比之前更多,大自然已經對我哋敲響警鐘。

2004年聯合國全球契約組織提出「ESG」,分別是環境保護(E, Environmental)、社會責任(S, Social)和公司治理(G, governance),以呢個永續經營,作為新形態評估企業嘅數據同指標。

我嘅好友Innotier創辦人Juliana Lam,絕對稱得上係本地企業ESG先鋒。佢喺2022年分別獲得「最傑出可持續發展領袖獎」及「傑出可持續發展領袖獎」,佢用創新高科技同可持續嘅定位,希望能夠做生意之餘亦不忘為社會同地球出一分力。

疫情期間,香港每星期棄置5,400萬個一次性囗罩,少於10%香港人選用可重用囗罩,因此佢哋生產可多次清洗及重用嘅專利銀織滅菌口罩外,更用環保紗綫製成嘅布料,製作唔同嘅時尚保護性衣物、配飾同埋布藝家品,全方位用環保概念去保障大家嘅健康。

Innotier喺上星期4月22日世界地球日,舉辦口罩設計比賽,希望可以向多啲人推動為地球出一分力,亦希望大家轉用可重用口罩,減低碳排放量,同時,佢哋會按參賽人數捐同等數量嘅口罩畀我哋社會上無名英雄--清潔工人。

四周圍已經好多人同企業一齊為保護地球使命必達,咁你又開始咗你嘅愛護地球使命未?(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭