郭曉陽
郭曉陽

睇樓宜揀落雨天

發佈時間: 2023/04/27

睇樓宜揀落雨天

話說上星期五同舊同事Denise食飯,講開買樓,原來佢喺過去一個月密密睇咗20個單位,去到要落手嘅階段,但就因為唔知買樓手續同過程,想問吓曉陽點安排。

其實買樓作為人生大事,真係要仔細考慮,唔係話買定唔買,而係揀樓嘅時候要好謹慎。

Denise就問,除咗造按揭,有乜要注意?曉陽回覆佢話,你睇樓時係咪好似你返工做化驗師咁認真,逐樣檢查?

按揭固然多魔鬼細節,但曉陽當日提醒佢,睇樓如果唔仔細,好容易就會中招,分分鐘之後花好多錢跟手尾。

咁啱呢段時間落雨又潮濕,曉陽話好適合睇樓。Denise就話,落雨咁麻煩,而且人哋啲單位有人住緊,好唔方便喎!

其實,落雨先係驗明正身嘅最好時機。第一,外牆有無滲漏、窗台有無滲水,就喺落雨先睇到;等到陽光普照嘅日子,就算本身有問題,都唔會察覺。第二,浴室廚房呢啲比較潮濕嘅地方,甚至房間牆角等等,正正係要潮濕季節睇,先會見到有無發霉迹象;如果乾爽通風嘅日子睇樓,絕對唔會留意到。

第三,好多人都唔會留意到,天花同地板會唔會有積水問題。天花有滲水,可能係樓上漏水,但都有機會係外牆入水導致;而地板有水漬,就可能係樓下因為潮濕開冷氣導致。

上述3個問題,正正係出現喺落雨潮濕時間,所以曉陽就提醒,既然有心買,當然要揀呢啲日子睇。

Denise聽完,都覺得有道理;但佢又唔明白,滲水漏水真係咁麻煩嗎?

經歷過家居裝修嘅讀者朋友應該都會知道,花錢維修固然慘,更慘好多渠管係入牆,唔係話換就換到,一拆一裝,分分鐘就唔見幾萬蚊,仲未計算裝修期間要搬出去住,所以你話睇樓係咪要仔細?

(本欄逢周四刊登)

撰文: 郭曉陽 財務未自由,仍繼續打工,齊齊學理財,講錢為致富
欄名: 講錢•智富