用e-道的尷尬經歷

疫情後，我呢個井底蛙出門外遊，真係感覺到讀萬卷書不如行萬里路，識人好過識字，最緊要跟住識途老馬去旅遊。

之前已聽過多次政府喺電台或電視宣傳「智方便」同「非觸式e-道」，每次聽都係左耳入右耳出。撘一次高鐵去深圳福田，我即刻要download晒呢啲app。

而家出入境，通通要用智能系統，如果自己仲唔跟住個新時代行，仲好似以前咁唔用智能科技通道排隊過關，但同行朋友全部一早快快手過晒關，要企喺度等你，你就會畀人嫌棄。

加上好多人排隊過關時，個個唔知點解真係好趕咁，一旦你攞錯卡或擺錯方向，搞唔清證件相應該向上定向下，又或卡住咗，排你後面嘅人就會唔耐煩，令我好緊張。一緊張就更加唔知應該點放，結果發現原來我用錯證件，過呢度原來唔係用回鄉證而係用香港身份證，真係面懵懵。於是我決心即刻download啲智能app過關，話畀自己聽，自己必須瀟灑走一回。

我啱啱又去上海，即刻試用「非觸式e-道」，打開手機，完全唔使攞自己嘅證件，用二維碼一「嘟」，過關門一開我開心到yeah一聲！之後同朋友分享我嘅成功感，原來個個朋友一早已經用緊。所以你話係咪要出嚟多感受下呢個新世代，等自己知道點去配合，點樣與時並進。

今次喺上海酒店，前台有物件要送上房畀我，打開門，原來係機械人！佢用好得意嘅聲音叫我㩒個掣，佢個肚腩位門一開，我件物件就喺嗰度，好好玩呀！即刻同人分享我嘅見聞，結果換嚟朋友笑我無見識，即時謝晒。

今次嘅上海旅程，仲試咗好多新科技新發明，喺嘗試過程中令我好興奮，真正感受到咩叫劉姥姥入大觀園！（本欄逢周四刊登）