陳淑蘭
陳淑蘭

照顧腦退化患者不易

發佈時間: 2023/06/08

照顧腦退化患者不易

精神健康問題,人人都有潛藏危機,例如壓力、意外,甚至腦內有阻塞或缺少任何物質,都可能引發一啲情緒變化。

先唔講其他原因,淨係腦退化所引發嘅情緒變化,我身邊都有好幾個案例。我有位台灣女朋友,佢媽咪因為腦退化,時刻鍾意派錢畀陌生人,唔係時時㩒得住佢呢個「壯舉」。之後佢性格再發生變化,晚上半夜會走去我朋友房間企喺度,有好多次仲揸住把鉸剪,我朋友真係好驚,會鎖門瞓覺。

我媽咪之前都因為腦退化而時時有幻覺。試過工人姐姐趁佢瞓晏覺,好快去超市買嘢,返到屋企見到有警察喺度,原來我媽咪打電話報警,話床上有150萬元突然唔見咗!警察打畀我,我要同佢哋解釋媽咪有腦退化,麻煩咗佢哋。所以之後當無人睇住媽咪時,我要叫工人姐姐掹走個電話插蘇。

我媽咪甚至曾突然間好唔鍾意佢個工人姐姐,話佢帶男人返屋企。媽咪有一晚半夜12點幾趁工人姐姐瞓咗,自己一個人出街,後來我突然接到電話,有位便利店女士打電話畀我,嚇得我半死,即刻叫醒我屋企兩個工人姐姐同我去搵佢。當我見到佢時,佢仲要嬲過我,話因為佢屋企多咗個男人,當然大家都知係佢嘅幻象,我喺佢屋企裝晒CCTV,時刻check住佢嘅狀況,但係一有電話響我就會好緊張,唔知道又發生乜嘢事。

我相信如果屋企有腦退化患者,呢啲情況真係見怪不怪,有好多照顧者都係心力交瘁。所以,希望日後社會可以畀多啲精神健康資訊及支援,等大家可以知多啲,做得好啲。(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭